الاخوة بالمنتدى:
سبق ان وعدتكم بطريقة رهيبة للتعامل مع البيني ستوك وفي هذا الرابط سوف اقوم بشرح هذه الطريقة والترشيح ايضاً باسهم حتى تصل اليكم الطريقة نظري وعملي .
لذلك ارجو منكم قراءة هذه الطريقة جيداً وأي اسئلة انا مستعد للاجابة بعد انتهائي من الشرح.
هذه الطريقة قمت بتطويرها خلال السنة الماضية وهي لاتعتمد على تحليل اساسي ولا تحليل فني ولاموفنج افرج ولا اي شي اخر , طريقة بسيطة تحتاج الى فهمها أولا وان شاء الله سيكون لها المردود الجيد على الاخوان العرب.
اذا اتقنت هذه الطريقة جيداً فأنت مؤهل لتسديد فواتير الاتصال والانترنت بالاضافة لمصروف جيب شهرياً وارباح اخرى ان شاء الله.
لانطيل عليكم اليكم الطريقة:
اسهم البيني ستوك هي الاسهم التي قيمتها اقل من دولار وهي عرضة للافلاس ايضاً
كما ان التقلبات فيها تكون بدرجة كبيرة..
مثلا سهم قيمتة 50 سنت وتحرك 10 سنتات تكون نسبة حركته 20 %
فيما السهم اللي قيمته 50 دولار يلزمة حتى يتحرك نفس الحركة اي 20 % ,لابد ان يتحرك من 50 دولار الى 60 دولار اي 10 دولارات , وهذه تتطلب من السهم عدة ايام او شهور.
بينما في البيني ستوك خلال ساعة واحدة فقط قد يتحرك السهم اكثر من 50 % واحيانا خلال اليوم يتحرك اكثر من 100 % واكثر.
رأيت اسهم تحركت بنفس اليوم اكثر من 1500 % .
ايضا البيني ستوك كما تتحرك في الصعود فهي تتحرك بالهبوط وبنفس الحدة ونفس الاسلوب.
في الحقيقة اوردت هذه المقدمة لكي ابين مدى الخطورة في اسهم البيني ستوك.
لذلك انا اقترح على الاخوان ممن يريدون الشراء ان لا تزيد كمية الاسهم المشتراه عن 5000 سهم
لانك لو شريت مثلا 5000 سهم فراح تكون الحركة كالتالي:
5000 سهم *سنت=50 دولار
أي ان كل سنت زيادة راح يساوي 50 دولار.
5 سنتات زيادة فهي 250 دولار.
ننتقل بعد هذه المقدمة الى شرح للطريقة مباشرة:
اسهم البيني ستوك تعتبر من اشد الاسهم تأثرا بالاخبار,اي خبر ايجابي تجد السهم يتحرك تلقائيا وبزيادة كبيرة في كمية التداول وفي السعر:
بعض الاخبار التي ممكن ان تقلع باسهم البيني ستوك:
1-اعلان ارباح
2-اعلان خسارة اقل من المتوقع
3-عقد مع شركة ضخمة مثل مايكروسوفت او جنرال موتورز او ...
4-عقد مع شركة اكبر منها.
5-خبر مثل ان مدير الشركة سيطلع بالتلفزون بكرة في قناة مشهورة مثل CNN او..(لا تضحك ولكن هذا اللي حاصل ).
6-اشاعة على الشركة ستندمج مع شركة اخرى او ستقوم شركة اخرى بشرائها
7-شراءها من شركة اخرى.
والعديد من انواع الاخبار .....
طيب تقول كيف اتابع اسهم البيني ستوك وهل اقعد اقرا اخبارها كلها(المسألة صعبة)...
اقول لك لا ياحبيبي في هذا الرابط راح يوصلك مباشرة الى الشركات اللي نبيها بدون تعب ولا وجع راس ولا اخبار..
لان الاخبار عادة ماتاتي الا بعد قفل السوق
http://dynamic.nasdaq.com/dynamic/afterhourma.stm
هذا الرابط يعطيك الحركة بعد اقفال السوق الرسمي
روح للرابط وابحث عن اسهم البيني ستوك اللي اقل من دولار وزايدة اكثر من30 %او 40 % مثلا او 50 % او100 % او 1000 %
حتما ستجد سهم او سهمين واذا مالقيت اليوم راح تلقى بكرة وهكذا...
خذ السهم وسجل سعر الاقفال الرسمي لليوم (اللي قفل عليه السوق الساعة 12 مساء بتوقيت السعودية)
وسجل ايضا اعلى سعر وصل له السهم بعد التداول (سعر الاقفال الساعة 4 فجر بتوقيت السعودية)
وسجل ايضا اعلى سعر وصل له السهم خلال وقت الافتر اورز
احفظها جيدا لاننا سنستخدمها بكرة .
طيب تمام الحين انا حصلت سهم ABC ( مثال لا تسجلونه.. )
السهم اللي حصلناه قفل اليوم السوق الرسمي على 20 سنت
وجينا على الرابط اللي فوق لقينا السهم اقلع بعد السوق ووصل الى 30 سنت وقفل نهائي على 28 سنت
اكيد لما تجي تراجع اخبار السهم تلقاها احد الاخبار السبعة الايجابية اللي كتبتها فوق
ولكن مفعولها لن يستمر الا يوم واحد فقط
اكرر واقول يوم واحد فقط
تمام نسجل هالاسعار ونقفل الجهاز.
ونجي اليوم الثاني والساعة 4 عصر بتوقيت السعودية ونفتح الجهاز
ونروح على الايسلند بوك مثلا او اي ليفل تو اخر ونراقب السهم.
نراقب السهم لحد ما ينزل الى سعر اقفال امس الرسمي
اللي هو 20 سنت
واذا مانزل لنفس السعر نحاول نصيدة بسعر قريب من ال20 مثلا 21 او 22 او 23 او 24
ونمسك السهم لحد ما يبدا السوق الرسمي
كلها ساعة ونص الى بدء السوق الرسمي (لاتخاف ما راح يحرقك السهم خلك ماسكه)
المهم مع بداية السوق الرسمي راح يفتح السهم صاروخ فوق (هذا اذا ماطيروة المضاربين قبل بداية السوق الرسمي )وراح تبيع ان شاء الله فوق 30 سنت او اكثر...
لكن انتبه بيع اول ربع ساعة وبيع ماركت بعد لاتنتظر اكثر من كذا.
واحسب مكاسبك وقول الله يجزاك بالخير ياملك الناسداك..
هذي هي الطريقة
لكن الان خلوني اشرح لكم ليه الطريقة كذا:
الشي اللي ماتعرفون وامكن خافي عليكم ان المضاربين المتخصصين بالبني ستوك هذي طريقتهم.
يستغلون اي خبر على البيني ستوك حتى لو كان تافه جداً ويقلعون بالسهم بعد قفل السوق الرسمي الى مستويات مرتفعة.
وفي اليوم الثاني لما يبدا السوق غير الرسمي يمسكون السهم مايخلونه يرتفع وينزلونه الى مستويات قريبة من سعر اقفال الامس الرسمي.
وكل ما جا يطلع نزلوة
وليه ينزلونه الى مستويات قريبة من اقفاله الرسمي بالامس ؟
عشان يشترون كميات اضافية فيه.
ومع بدء السوق الرسمي يفكون يدينهم عن السهم ويقلع.
ويبيعون اول ربع او نص ساعة على المجانين.
هذه الطريقة هي الطريقة الصالحة للاستخدام مع البيني ستوك .
اما يجيني واحد ويقول ابشتري MFNX ب 5 سنت او 90 سنت او دولار استثمار
ويمسكها شهور تقول انه ماسك جنرال موتورز او ميكروسوفت (هذي مقولة للسبيعي)
فهذ والله اللي بيخسر ويوجع راسه.
راح اضع لكم اليوم 3 امثلة لاسهم طبقت الحالة عليها خلال الاسبوع اللي راح
وراح اضع لكم سهم عشان نطبق عليه
لذلك اي استفسار ارجو ان يكون برابط اخر او الانتظار حتى اكمل وضع الامثلة وايصال مالدي اليكم
والسلام عليكم ورحمة الله وبركاته
المفضلات